ຄະນະກໍາມະການຄຸ້ມຄອງຕະຫຼາດຫຼັກຊັບແຫ່ງຊາດລາວລາຍງານວ່າ ໃນຕະຫຼອດປີ 2013ທີ່ຜ່ານມາ ການຊື້ຂາຍຮຸ້ນຂອງ 3ບໍລິສັດທີ່ຈົດທະບຽນໃນຕະຫຼາດຫຼັກຊັບຂອງລາວກໍຄືທະນາຄານການຄ້າຕ່າງປະເທດ (ມະຫາຊົນ) ຫຼື BCEL , ບໍລິສັດຜະລິດກະແສໄຟຟ້າ ລາວ(ມະຫາຊົນ) ຫຼື EDL--GEN ແລະ ບໍລິສັດ Lao World ຈໍາກັດ(ມະຫາຊົນ) ໃນຖານະທີ່ເປັນບໍລິສັດອັນດັບ 3ທີ່ຈົດທະບຽນໃນຕະຫຼາດຫຼັກຊັບລາວນັ້ນເຮັດໃຫ້ມີມູນຄ່າລວມກັນເກີນ 2,000 ຕື້ກີບ ຫຼືຫຼາຍກວ່າ 250ລ້ານໂດລາ, 
　　　　　　　　　　　　　　
ຄະນະກໍາມະການຄຸ້ມຄອງຕະຫຼາດຫຼັກຊັບແຫ່ງຊາດລາວໄດ້ດໍາເນີນການສໍາຫຼວດບັນດາບໍລິສັດໃນລາວຈໍານວນ 1,087 ລາຍ ຊຶ່ງກໍພົບວ່າມີຢູ່ 38 ບໍລິສັດທີ່ມີເງື່ອນໄຂທີ່ສາມາດຈົດທະບຽນ ໃນຕະຫຼາດຫຼັກຊັບໄດ້ແຕ່ປະກົດວ່າ ມີຢູ່ 20 ບໍລິສັດທີ່ໄດ້ສະແດງເຈດຈໍານົງທີ່ຈະຂໍຈົດທະບຽນໃນຕະຫຼາດຫຼັກຊັບ. ຄາດຫວັງວ່າການຈົດທະບຽນບໍລິສັດເຂົ້າໃນຕະຫຼາດຫຼັກຊັບເພີ່ມຂຶ້ນນີ້ຈະມີສ່ວນຢ່າງສໍາຄັນໃນການເຮັດໃຫ້ການຊື້-ຂາຍຮຸ້ນກັບຄືນສູ່ສະພາວະພົດພຶ້ນອີກເທື່ອໃໝ່.